قصه حقيقية عن الاخلاق

تحكى صاحبة القصة الاتى

من فترة كنت مضطرة انزل اشتري حجات مهمة بالليل في المعادي ومكنتش اعرف العنوان وانا في العربية كان باين عليا التوتر وكل شوية اسأل السواق عن المكان اللي هنزل فيه
لقيت شاب من الركاب بيقولي انا نازل نفس المكان وهعرفك اما يجي
نزلنا بعدها ولقيته بيسالني هروح فين بالظبط وفضل يلف يسال عن المكان وانا مستغربة من اهتمامه لحد ما وصلت بس المشكلة ان المكان كان في مكان هادي ومفيهوش محلات كتير او وشبه مفيش ناس ماشية في الشارع

شكرته ولقيته بيقولي هو حضرتك عارفه هتروحي ازاي قلتله هبقى اخد تاكسي او اسال عن مكان العربيات لقيته بيقولي اتفضلي هاتي الحاجه وانا هستناكي عشان اوصلك شكرته تاني ورفضت وبدأت اقلق دخلت اشتريت الحاجه وطلعت لقيته فعلا مستني بس المرة دي لقيته ماشي قدامي وشوية لقيته بيكلم واحدة وبيسالها عن الاكل وبيطمنها انه شوية وهيوصل البيت ولما قفل قالي دي مراتي اصل انا عريس جديد

كل دا من غير ما يسالني عن اي حاجه شخصية ولا يعتبر بصلي اصلا لحد ما وصلني اقرب محطة مترو واتاكد ان دا الاتجاه اللي بركب منه ولقيته بيقولي انا لقيت المكان مقطوع ومش امان تكوني لوحدك عشان كدا اصريت اني اوصل حضرتك لانك زي اختي ولقيته بعدها بيقولي سلام عليكم ومشي من غير اي كلام

ربنا يشهد ان كل كلمة حكيتها حصلت معايا فعلا 

والموضوع بحكيه لسببين

 الاول اني لقيت ناس بتشتكي من مواقف كتير سيئة حصلت مع ناس في الشارع لدرجة اني حسيت ان الناس كلها بقت زفت بس الموقف دا حسسني ان لسه فيه خير وفي نفس الوقت انا معرفش ليه كنت فعلا متطمنة وقتها و لو اتكرر معايا نفس الموقف مش هتصرف نفس التصرف ومعرفش ليه

ثانيا انا عاوزة اقول للشخص دا ربنا يجازيك كل خير ويباركلك في مراتك ويرزقك بالذرية الصالحة كل اللي اعرفه ان اسمه احمد وشغال في شركة بترول في المعادي