السجائر والجد الحنون
جدي الله يرحمه
كان مدخن شره جدا و شريب شاي كان يولع السيجارة الصبح بعود كبريت واحد و يكمل باقي اليوم سيجارة من التانيه
كان بيشرب سجاير لف....
والدي كان هو الأصغر وسط اخواته ... في يوم جدو بيدور لقى المخزون من التبغ و البفره قرب يخلص .. بعت بابا عشان يروح يجيبله و الدكان القديم كان بعيدعن بيتهم مش اكتر من 500 متر .... المهم بابا راح فتقريبا كان الموتوسيكل اللي بيجيب السجاير و مستلزماتها مجاش لسه ... فعارف ان جدو مبيقدرش يقعد من غيرها ...
فراح يدور ابعد شوية و اتأخر ... فلما رجع كان جدو سجايره خلصت و بقى على اخره
دخل بابا عليه و طبعا جدو مكانش طايق نفسه قام و شخط فيه فبابا شرحله سبب تأخيره
قعد جدو و خد نفس و قال لبابا هات اللي معاك اداله التبغ و البفره راح رميهم في الدولاب اللي في الحيطة و قاله من غير حلفان و لا يمين طلاق .. من النهارده لا سجاير و لا شاي .... و اداله مكنه اللف قاله خد العب بيها بابا عملها مقلمة 😂
جدو كان في اول الاربعينات يوم ما بطل و توفى عنده 85 سنة.
جدو كان في اول الاربعينات يوم ما بطل و توفى عنده 85 سنة.
محطش فيها سيجارة في بقه و لا ساعة نرفزة و لا مع اي مشكلة و بدل الشاي بالقرفة المحوجة بالزنجبيل كنت بموت فيها من عنده
لما بابا سأله على كبر ايه اللي خلاك تاخد القرار في اليوم ده ... قاله انا من عصبيتي كنت حالف لاشيلك و اخبطك في اي حيطه لما أشوفك
وفلحظة فكرت
كل العصبية دي ليه ؟
عشان كوباية شاي و سيجارة تخليني اأذي ابني !
الراجل مفيش حاجة تسوقه و لا تتحكم فيه اي حاجة تاني هو اللي يتحكم بس .
جدو لا كان فيه ايامهم تنمية بشرية و لا متحدثين تحفزيين.
جدو لا كان فيه ايامهم تنمية بشرية و لا متحدثين تحفزيين.
جدو مسألش حد ابطل ازاي ؟
و لا قال لاصحابه ادعولي ربنا يتوب عليا
جدو عارف انه هو صاحب القرار و ربنا خلقه حر
نتيجة اللي عمله جدو الله يرحمه لا بابا طلع مدخن و لا انا حطيت سيجاره في بوقي.
خليك سيد قرارك و سيب وراك سنه حسنة الناس تدعيلك عشانها
الله يرحمك يا حبيبي نعم الاب و الجد
البقاء لله
الله يرحمك يا حبيبي نعم الاب و الجد
البقاء لله
